Skipulags- og umferðarnefnd Rangárþings ytra

Eigendur Auðkúlu L165448 óska eftir að fá að skipta út lóð úr jörðinni. Lóðin yrði 1088,1 m² að stærð, fengi heitið Auðkúla 2 og Lxxxxxx. Núverandi matshlutar 02 og 03 flytjast yfir á nýja lóð. Uppdráttur landskipta frá Punktum og hnitum ráðgjöf dags. 4.1.2024.

Farið yfir afmörkun lóðarinnar Þrúðvangur 6. Lóðin er skráð 1.826 m² en verður 3.822,5 m² eftir nákvæmari mælingar og skýrari línur.

Vinjar ehf, eigandi Merkihvols lands L192626, leggur fram yfitlitsuppdrátt sem sýnir ytri mörk jarðarinnar, staðfest af öllum eigendum aðliggjandi jarða. Uppdráttur frá Landformi dags. 30.1.2024.

Vinjar ehf, eigandi Galtalækjarskógar L165042, leggur fram yfitlitsuppdrátt sem sýnir ytri mörk jarðarinnar, staðfest af öllum eigendum aðliggjandi jarða. Uppdráttur frá Landformi dags. 29.12.2023

Lagðar eru fram tillögur að lóðablöðum fyrir eftirtalin svæði: Breiðalda 8, íbúðarhúsalóð og tvær lóðir við Baugöldu í stað leiksvæðis.

Eigandi Tindasels 1 og Tindasels 2 óskar eftir að fá að leggja fram deiliskipulag af aukinni starfsemi en nú er á svæðinu. Samhliða óskar hann eftir að gerðar verði nauðsynlegar breytingar á aðalskipulagi til samræmis við aukin áform við ferðaþjónustu á svæðinu. Áform gera ráð fyrir móttöku allt að 200 gesta, byggingar hótels og gistiaðstöðu ásamt veitingasölu og að auki bættari aðstöðu fyrir starfsfólk og gistingu fyrir starfsfólk. Lögð er fram sameiginleg lýsing skipulagsáforma, bæði vegna breytingarinnar á landnotkun í aðalskipulagi og vegna deiliskipulags. Gögn frá Eflu dags. 27.2.2024.

Eigendur lóðanna Móholts 1 og Hrafnaþings óska eftir heimild til að leggja fram tillögu að deiliskipulagi af svæðinu í samræmi við skipulagstillögu frá Kanon arkitektum dags. 13.2.2024. Markmið deiliskipulagsins er að skilgreina tvær lóðir á landi Hrafnaþings L233392 og skilgreina á þeim byggingarreiti fyrir vélageymslur og gripahús og skilgreina byggingarreit á lóðinni Móholt 1, L205150 fyrir íbúðarhús, baðhús og gestahús og bílskúr. Aðkoma að lóðunum er frá Þykkvabæjarvegi nr. 25.

Vegna fyrirhugaðrar stækkunar og aflaukningar Sigöldustöðvar er þörf á vinnubúðum fyrir verktaka meðan á framkvæmdum stendur. Reiknað er með að þurfi aðstöðu fyrir um 150 manns. Settir verða inn byggingareitir fyrir þær í námu sem er sunnan við Sigöldufoss í Tungnaá. Aðkoma verður um núverandi vegslóða að námunni. Mögulega verður efni úr námunni nýtt í framkvæmdir eða að efni verður haugsett í námunni. Náman verður innan deiliskipulagssvæðis og gerð grein fyrir efnistöku/haugsetningu og frágangi námunnar og svæðisins alls við lok framkvæmda. Einnig verður sett inn vatnsból og vatnsverndarsvæði umhverfis það. Breytingin nær einungis til svæðis innan Rangárþings ytra. Óskað er eftir heimild til gerðar deiliskipulags.

Eigendur lóðanna Árbakki lóð 41 - L214332, Árbakki lóð 43 - L214332, Árbakki lóð 45 - L214335, Árbakki lóð 40 - L214331, Árbakki lóð 42 - L214333, Árbakki lóð 44 - L220921 og Árbakki lóð 46, L220922 óska eftir að fá að gera minni háttar breytingu á gildandi deiliskipulagi fyrir Árbakka frá árinu 2006 þar sem byggingareitir verði færðir til innan lóða, örlitlar leiðréttingar gerðar á afmörkun og stærðum lóða og vegakerfi uppfært í takt við núverandi legu vega innan svæðisins. Að auki er kvöð sett á lóðir nr. 40, 42, 44 og 46 um aðkomu að lóðum nr. 41, 43 og 45. Skipulagsgögn frá Landformum dags. 14.2.2024.

Eigandi lóðarinnar Hagi v/Selfjall 2, L176252, óskar eftir að fá að gera breytingar á gildandi deiliskipulagi fyrir svæðið, dags. 10.6.1992, þar sem heimiluð verði áform um útleigu gistingar í flokki II ásamt rekstri til leiðtoga- og heilsuþjálfunar. Óskað er eftir að landnotkun lóðarinnar í aðalskipulagi verði breytt úr frístundasvæði í Verslunar- og þjónustusvæði til samræmis við fram lögð áform.

Heimahagar hrossarækt ehf, eigandi Heimahaga L206436, hafa fengið heimild til að leggja fram deiliskipulag af 25 ha svæði úr jörð félagsins undir frístundanotkun. Gert verði ráð fyrir að landnotkun í aðalskipulagi verði breytt samhliða en landið er skráð landbúnaðarsvæði í dag. Áform eru um uppbyggingu fyrir allt að 30 frístundahús. Aðkoman er skilgreind frá Árbæjarvegi nr. 271. Lögð er fram sameiginleg lýsing skipulagsáforma, bæði vegna breytingarinnar á landnotkun í aðalskipulagi og vegna deiliskipulags. Gögn frá Eflu dags. 29.2.2024.

Skipulagsstofnun leitar umsagna umsagnaraðila vegna tilkynninga til ákvörðunar um matsskyldu á

grundvelli 20. gr. laga um umhverfismat framkvæmda og áætlana nr. 111/2021. Fyrirhuguð er efnistaka á allt að 70.000 m3 af efni á 6,8 ha svæði úr Minnivallanámu í landi Minni-Valla í sveitarfélaginu Rangárþingi Ytra. Efnistaka hefur verið stunduð í námunni í áratugi og áætlað er að um 20.000 m3 af efni hafi verið teknir úr námunni á um 1,4 ha svæði en skv.

aðalskipulagi er heimilt að vinna allt að 50.000 m3. Því er verið að auka efnistökuheimild um 40.000 m3. Efnistaka mun fara fram innan núverandi efnistökusvæðis sem þegar er raskað og á 5,4 ha óröskuðu svæði. Framkvæmdaraðili er Landefni ehf.

Landsvirkjun sækir um framkvæmdaleyfi vegna undirbúnings á uppsetningu vinnubúða vegna framkvæmda við Hvammsvirkjun. Reiknað er með allt að 400 manns verði í búðunum þegar mest lætur og að uppbygging virkjunar standi í allt að 5 ár. Deiliskipulag fyrir svæðið er í lokaferli.

Vegagerðin, í tengslum við byggingu Hvammsvirkjunar, óskar eftir framkvæmdaleyfi til styrkingar og endurbyggingar á núverandi Hvammsvegi frá Landvegi að bænum Hvammi 3. Gert verði ráð fyrir tveimur akreinum, 2x3m, og hæðarlega vegarins löguð. Umsókn barst dags. 29.2.2024.

Land og skógur óskar eftir framkvæmdaleyfi til nýræktunar skógar á Stórholti, um 136 ha svæði úr landi Geldingalækjar. Geldingalækur er í eigu íslenska ríkisins og í umsjá Lands og Skógar. Gögn með umsókn er greinargerð frá skipulagsfulltrúa Lands og Skógar ásamt yfirlitskortum af fyrirhuguðu skógræktarsvæði.

Sveitarstjórn Rangárþings ytra samþykkti á fundum sínum, annars vegar þann 13.4.2023 að gera breytingar á landnotkun í aðalskipulagi sveitarfélagsins 2016-2028 fyrir Háasel og hins vegar á fundi 13.9.2023 fyrir Aðalsel, Mósel, Sel og Vestursel, þar sem núverandi frístundasvæði verði breytt í landbúnaðarsvæði fyrir öll svæðin. Lögð er fram sameiginleg lýsing skipulagsáforma frá Eflu dags. 27.2.2024

Rangárþing ytra vinnur að breytingu á Aðalskipulagi Rangárþings ytra 2016-2028, skv. 1. mgr. 36 gr. skipulagslaga nr. 123/2010. Breytingin nær til lóðarinnar Mosar (L227577) þar sem landeigandi hefur óskað eftir að lóð hans verði skilgreind sem frístundabyggð. Samhliða aðalskipulagsbreytingunni er unnið að gerð deiliskipulags fyrir skipulagssvæðið þar sem gert er ráð fyrir frístundabyggð fyrir allt að 16 lóðir. Tillagan var auglýst frá og með 3.1.2024 til og með 22.2.2024. Umsagnir bárust frá Minjastofnun, Heilbrigðiseftirliti Suðurlands, Umhverfisstofnun og Vegagerðinni, sem gerðu engar athugasemdir.

Sveitarstjórn Rangárþings ytra samþykkti á fundi sínum þann 14.12.2022 að gera breytingar á landnotkun í aðalskipulagi sveitarfélagsins 2016-2028 fyrir Háfshjáleigu 1, 2 og 3 þar sem núverandi landbúnaðarsvæði verði breytt í Verslunar- og þjónustusvæði. Í auglýsingu lýsingar komu fram athugasemdir frá eigendum Háfshóls L165383 þar sem fullyrt var að eignarhald á umræddum spildum innan svæðisins sé ekki í samræmi við þinglýst gögn. Eftir að tillagan var samþykkt til auglýsingar í Skipulags- og umferðarnefnd komu fram athugasemdir frá 25% eignaraðila að Háfshóli sem tekur undir þær athugasemdir sem áður höfðu fram komið. Um sé að ræða þær fjórar spildur sem eru innan svæðinsins sem samþykkt hefur verið að breyta landnotkun á, en haldið er fram að þær spildur hafi alla tíð verið sameignarland í eigu jarðanna Háfshóls, Hala, Háfs og Háfshjáleigu og geti því ekki talist eign núverandi eiganda nema að hluta til. Athugasemd barst með tölvupósti 10.10.2023. Skipulagsstofnun heimilaði auglýsingu eftir minni háttar lagfæringar í texta. Tillagan var auglýst frá og með 17.1.2024 til og með 1.3.2024. Umsagnir bárust frá Heilbrigðiseftirliti Suðurlands, Mílu, Veitum, Vegagerðinni og Umhverfisstofnun þar sem ekki voru gerðar athugasemdir en ábendingar komu frá Umhverfisstofnun um að skýra þurfi betur umfang fráveitu. Ábending barst að auki frá Brunavörnum Rangárvallasýslu um að gera þurfi ráð fyrir slökkvivatni og að aðkomuvegur þurfi að þola 30 tonn. Ábending frá Heilbrigðiseftirliti Suðrlands þess efnis að betur hefði átt að nefna gistiskála frekar en smáhýsi í texta, þar sem skilgreining á smáhýsi er allt önnur en til gistingar.

Eigendur lóðarinnar Háteigs í Þykkvabæ hafa fengið heimild til að leggja fram tillögu að deiliskipulagi af lóð sinni. Um er að ræða áform um uppbyggingu á ferðaþjónustu með stækkun íbúðarhúss og byggingu gistihúsa fyrir allt að 25 gesti. Unnið er samhliða að breytingum á landnotkun í aðalskipulagi sveitarfélagsins þar sem núverandi landbúnaðarnotkun var færð í Verslunar- og þjónustunotkun. Lögð er fram tillaga að deiliskipulagi frá Eflu dags. 9.2.2024.

Eigandi tveggja lóða úr skipulögðu landi Haukadals, L219700 og L205514, hefur fengið heimild til að gera breytingu á gildandi deiliskipulagi fyrir svæðið sem samþykkt var 20.3.1996 þar sem bætt verði við einni lóð í eigu umsækjanda og skilgreindar verði byggingarheimildir á henni til samræmis við aðrar lóðir á svæðinu. Deiliskipulag þetta nær aðeins til norður svæðisins og er því uppfærsla á þeim hluta eldra deiliskipulagsins. Breyting deiliskipulagsins tiltekur nýja lóð, með landnúmer 219700, ásamt því að tiltaka tvo nýja byggingareiti innan þeirrar lóðar. Breytingin var grenndarkynnt með bréfi dags. 7. júní 2023 og stóð kynning yfir fram til 6. júlí sama ár. Engar athugasemdir bárust. Tillaga var auglýst frá og með 3.1.2024 til og með 14.2.2024. Athugasemd barst frá Vegagerðinni þar sem tengingum við Þingskálaveg var talið ofaukið en sú umsögn var svo dregin til baka; frá Brunavörnum Rangárvallasýslu, þar sem bent var á mikilvægi þess að huga þyrfti að flóttaleiðum út úr svæðinu ef frekari uppbygging yrði þar; frá Landi og Skógi, Mílu, Veitum og Heilbrigðiseftirliti Suðurlands, sem gerðu engar athugasemdir.

Lögð hefur verið fram tillaga að deiliskipulagi fyrir uppbyggingu á flugvallarsvæðinu á Hellu. Skipulagsgögn frá Landhönnun dags maí 2022. Sveitarstjórn, að undangengnum fundi Byggðaráðs, frestaði afgreiðslu skipulagsferilsins þar sem ákveðið var að framkvæmd yrði hljóðmæling m.t.t. frekari uppbyggingar á flugvellinum. Hljóðmæling liggur nú fyrir frá Mannvit, dags. í nóvember 2023.